Fatma Chak ek aisa gawon bhi!

فاطمہ چک - ایک گاؤں ایسا بھی!

میری دلی خواہش تھی کہ گاؤں میں ایک ایسی درس گاہ (اسکول) جس میں دینی و عصری تعلیم دی جاتی ہو اس کا قیام ہو۔ اسی طرح لڑکیوں کے لیے ایک اچھا ادارہ قائم کیا جائے جہاں نہ صرف گاؤں کی لڑکیاں بلکہ دور دراز لڑکیاں بھی دینی و عصری تعلیم سے آراستہ ہو کر قوم و ملت اور بہترین سماج میں معاونہ ہو۔

غریب بچوں کے لیے حسب سہولت اسکالر شپ کا نظم اورلڑکیوں/عورتوں کے لیے ایک سلائی سنٹر جہاں سے انھیں نہ صرف سلائی سیکھنے کا موقع ملے بلکہ دینی ماحول میں دین کی بات سیکھنے کا بھی موقع ہو اور ان غریب بچیوں کو جو وہاں سے سلائی سیکھ لیں انھیں ان کی شادی کے موقع پر تحفۃ سلائی مشین دی جائےاور لڑکوں کو ہائرایجویشن کے لیے ان کی بھرپور رہنمائی اورمدد کی جائے۔

معمولی علاج و معالجہ کے لیے چھوٹا سا عام چیریٹیبل کلینک کا قیام ہو جہاں سے غریبوں اور ضروت مندوں کے لیے معمولی علاج ومعالجہ کی سہولت ہو۔ جس کے ذریعہ خدمت خلق اور دعوت دین کا کام بھی آسانی سے ہوسکتا ہے۔ 

قدرتی آفات سے متاثر لوگوں کے لیے فوری راحت رسانی کا کام انجام دیا جائے اس کے لیے ایک نظم قائم ہو تاکہ مصیبت زدگان کے لیے فوری اور بہتر انداز میں ان کی راحت رسانی کی خدمت ہو سکے کیوں کہ اسلام نے خدمت خلق کا وسیع تصور دیا ہے جسے نظر انداز نہیں کیا جانا چاہے۔

ان مقاصد کے حصول کے لیے اہل خیر حضرات سے رجوع کیا جائے، جن کی جتنی پہنچ اور سکت ہے وہ ان کاموں میں حصہ لیں۔ فارغین مدارس اور فارغات کا تعاون لیا جائے اور گاؤں کے دوسرے عصری علوم کے ماہرین سے ان کی خدمات حاصل کی جائے، سب کی کوششیں ہوں گی تو ہمارا گاؤں واقعی مثالی گاؤں ہوگا تعلیمی میدان میں ضلعی سطح پر فوقیت رکھنے والا یہ گاؤں اپنے وقار کو برقرار رکھتے ہوئے اپنے معیار کو مزید بلند کرنے میں بھی کامیاب ہوگا اور بہت سے خرافات سے محفوظ بھی رہے گا۔ 

یہ میری خواہش اور اس کام کو کر گزرنے کا جذبہ ہے فی الحال ایک خواب ہے، اللہ جانے میرا یہ خواب کب شرمندۂ تعبیر ہوگا۔ مجھے لگتا ہے کہیں میں نے کچھ زیادہ ہی خواب دیکھ لیا ہے پر یہ بھی حقیقت ہے کہ خواب دیکھنے والے ہی اس کی تعبیر تلاش کرتے ہیں۔ مجھے لگتا ہے ہمارے گاؤں کے سارے لوگ ایسا سوچتے ہوں گے بلکہ اس سے بہتر پلان رکھتے ہوں گے اور ہم باہم ایک دوسرے کے تعاون سے ہی بڑے اہداف کو حاصل کرنےمیں کامیاب ہو سکیں گے۔ میں نے بہت  کچھ اپنے والد صاحب کو ایسا کرتے دیکھا، سنا اور ان سے سیکھا ہے جو اپنی بہت سی  بشری کمزوری و کوتاہیوں کے باوجود خدمت خلق میں نمایاں کردار ادا کر چکے ہیں۔ اللہ تعالی انھیں غریق رحمت کرے اور جنت میں اعلی مقام بخشے۔

اللہ تعالی سے امید رکھتا ہوں اور حتی الامکان کوشش کرتا ہوں اور توقع ہے کہ گاؤں والے بھی اس کار خیر میں ایک دوسرے کے معاون ہوں گے۔ اللہ تعالی بہترین کارساز ہے۔ حسبنا اللہ و نعم الوکیل ...نعم المولیٰ و نعم النصیر!

محب اللہ قاسمی

Islami Quiz me Hissa Len

اسلامی کوئز

الحمدللہ تعالی اسلامی معلومات کے کوئز کا ایک سلسلہ شروع کیا گیا ہے۔ جسے بہت ہی خوب صورت انداز میں تیار کیا گیا ہے جو انتہائی مفید اور دلچسپ بنا کر پیش کیا گیا ہے۔ اگر آپ چاہتے ہیں کہ خود اور بچوں کو دینی معلومات سے جوڑے رکھیں اور ان میں یہ جذبہ پیدا کریں تو اپنی دینی معلومات میں اضافہ اور اس کی یاد دہانی کے لیے ہمارے اس کوئز کا ضرور حصہ بنیں۔ ممکن ہے کہ ان میں سے بیشتر میں آپ نے حصہ لے لیا ہوگا اگر کوئی رہ گیا ہے جہاں تک آپ کی رسائی نہ ہو سکی ہو تو اسے تمام کوئز کے لنک کو یہاں یکجا کر دیا گیا ہے۔ آپ اپنی پسند اور ضرورت کے مطابق اس کے سہارے کوئز کا حصہ بن سکتےہیں۔ جزاکم اللہ خیرا

محب اللہ قاسمی

معاون شعبہ تربیت

رابطہ کا نمبر: 9311523016

ای میل: 

mohibbullah.qasmi@gmail.com

Quiz No. 1

عربی زبان کوئز

تربیت کے تقاضوں میں سے ہے کہ انسان اپنی صلاحیتوں کو بھی پروان چڑھائے اسی بات کے پیش نظر گزشتہ ویڈیو میں یہ بات بتائی گئی تھی کہ انسان کے اندر مختلف صلاحیتیں ہوتی ہیں ذرا سی توجہ دے اور اسے بہتر کرنے کی فکر کرے تو وہ اسے بہتر انداز میں کر سکتاہے۔ اسی میں زبان سیکھنے کی بات بھی تھی۔ اس لحاظ سے نئی زبان کا سیکھنا ضروری ہے ان زبانوں میں خاص طور پر عربی زبان کہ یہ قرآن و حدیث اور اسلامی ماخذ کی زبان ہے۔ جس کی اہمیت کے پیش نظر حضرت عمرؓ کا فرمان ہے:

عربی زبان سیکھو کیوں کہ اس سے آداب نفسانیہ میں

اضافہ ہوتا ہے۔ عربی زبان سیکھو کیوں کہ

یہ دین سے ہے۔ (بیہقی فی شعب الایمان،ایضاح الوقف و الابتدا)

اس کے لیے یہ ویڈیو مفید ثابت ہوگی۔ آپ ضرور ملاحظہ فرمائیں۔

نوٹ: عربی سوالات کے گوگل فارم کے لیے درج ذیل لنک کو کلک کریں۔

https://forms.gle/zhuo41WE6ovAL5HEA

اسے کلک کر تے ہی فارم کھلے گا جس میں ای میل اور نام درج کریں پھر تمام 25 سوالات حل کرنے کے بعد سب مٹ کریں تو اس میں کچھ لکنے کو کہا جائے گا چار پانچ ڈیزٹ نمبر ڈال کر سب میٹ کریں پھر ویواسکور سے اپنا اسکور چیک کر لیں۔ اگر کچھ غلط جواب دیا گیا ہوگا تو وہ بھی دکھے گا۔

Quiz No. 2

سیرت رسولﷺ کوئز

ہم سب جانتے ہیں کہ نبی کریم ﷺ کی عمر 63 سال کی تھی اور بہ حیثیت نبی آپ نے 23 سال زندگی گزاری اسی وجہ سے 23 سوالات پر مبنی سیرت رسول کوئزتیار کیا گیا ہے۔ درج ذیل لنک کے سہارا آپ بھی اس کوئز کا حصہ بن سکتےہیں۔

https://forms.gle/oJ5JWdCgC1Qxfmw29

Quiz No. 3

رمضان المبارک کوئز

اس کوئز کے ذریعہ طلبہ اور عام لوگوں تک  دلچسپ انداز میں معلومات فراہم کرنے کی کوشش کی ہے۔  

اس کوئز میں ہر سوال کے درست جواب پر 3 نمبر ملیں گے۔ سوائے 1 سول کے اس پر صرف ایک نمبر ملے گا. یہ کوئز 8 سے  12 کلاس کے طلبہ و طالبات کے لیے ہے۔ دیگر حضرات بھی اپنی معلومات کے مطابق اس کا حصہ بن سکتے ہیں۔ 

اس کوئز میں حصہ لینے کے لیے درج ذیل لنک کا سہارا لیں اور دعاؤں میں اس خاکسار کو یاد رکھیں۔ 

محب اللہ قاسمی

https://forms.gle/anQE6FecbUKmP4SPA

Quiz No. 4

 رمضان المبارک کوئز 2

الحمدللہ رمضان کوئز 1 کے کامیاب انعقاد کے بعد اب رمضان المبارک کوئز 2

کا انعقاد کیا جا رہا ہے۔ درج ذیل لنک کے سہارے آپ بھی اس کا حصہ بن سکتے ہیں۔ 

https://forms.gle/5N6Tdb47C1CpYeuK8

Quiz No. 5

قربانی - سیرت ابراہیمؑ کوئز

اس کوئز کے ذریعہ ہم سیرت ابراہیمؑ کے کچھ ان اہم پہلؤوں کو جنھیں ہم نہیں جانتے جانیں گے اور جانتے ہیں تو اپنی یاد داشت کو چیک کریں گے۔ اس لیے کہ ماہ ذی الحجہ میں عید قرباں اور حج کی ادائیگی ہماری ان یادوں کو تازہ کرتا ہے جو حضرت ابراہیمؑ سے منسلک ہے۔

کوئز کے لیے درج ذیل لنک پر کلک کریں اور شروع ہو جائیں۔

https://forms.gle/vSR4iYVaSiQmu5fq5

QURBANI Sirat e Ibrahim Quiz (Report)

 

امت مسلمہ کو حضرت ابراہیمؑ کی سیرت اور ان کے مشن سے واقف کراتے ہوئے قربانی کا مقصد بتایا جائے: محب اللہ قاسمی

قربانی -سیرت ابراہیم کوئز کا کامیاب تجربہ

طویل عرصے سے میں سوچ رہا تھا کہ  ہمیشہ ایسا ہوتا ہے کہ ماہ ذی الحجہ میں  لوگ قربانی کے مسائل سنتے ہیں اسے جاننے کی کوشش کرتےہیں۔ اسی طرح عیدالاضحی پر لوگ خطیب حضرات سے حضرت ابراہیم ؑ پر تقریریں سماعت کرتے ہیں ۔مگر ان نوجوانوں میں اتنی دلچسپی نہیں رہتی یا پھر سنی ان سنی کر جاتے ہیں کیوں نہ انھیں جوڑے رکھا جائے اور دلچسپ انداز میں ان کے درمیان قربانی کے ہلکے پھلکے مسائل بھی بتا دیے جائیں اور سیرت ابراہیمؑ اور ان کے مشن سے واقف بھی کرا دیا جائے۔ اس طرح وہ  تمام حضرات بھی اپناجائزہ لے لیں جو ان واقعات کو جانتے  ہیں مگر کچھ چیزیں ذہن سے محو  بھی ہوجاتی ہیں ، ان میں خاص طور پر ہماری مائیں اور بہنیں بھی شامل ہیں جو اپنی دیگر ضروری مصروفیات کے سبب اس جانب متوجہ نہیں ہو پاتیں!

لہذا اسی مقصد کے تحت اس ماہ ذی الحجہ کی مناسبت سے 5 جولائی کو قربانی -سیرت ابراہیم کوئز جو گوگل فارم پہ تیار کیا گیا اور اس کا لنک سوشل میڈیا کے ذریعہ ان تمام حضرات تک پہنچانے کی کوشش کی گئی جو سیرت ابراہیم سے واقفیت اور قربانی کے مقصد اور اس کی اہمیت کو جاننا چاہتے تھے۔

الحمدللہ ہمارے دوست و احباب کی محنت اور شرکاء کی دلچسپی کے باعث ملک اور بیرون ملک سے 1000سے زائد لوگوں نے اس میں حصہ لیا، جن میں سب سے بڑی تعداد 383 مہاراشٹرا کی تھی ۔پھر تلنگانہ 109اور کرناٹک 106 کی رہی ۔یہ بتانا بہت اہم ہوگا کہ اس میں نصف سے زائدتعداد خواتین کی تھی ۔اس کوئز کے حل کے لیے  زیادہ سے زیادہ 15 منٹ کا وقت درکار تھا۔سوالات ایسے تیار کیے گئے تھے کہ کوئی شخص اسے مکمل کیے بغیر نہیں رہ سکتا تھا۔ ان سوالات کے اختتام  پر برائے تبصرہ ایک کمنٹ باکس بھی رکھا گیا تھاجس میں شرکاء کے تاثرات اور وہ اس سے قبل راقم کے 4 کوئز میں سے کسی اور میں حصہ لیا تھا یا نہیں؟ یہ پوچھا گیا تھا۔ اس کے جواب میں  جو کمیٹ اور تبصرے آئے ہیں ان سے مزید حوصلہ ملا اور خوشی ہوئی کہ اللہ کی رضا کے لیے جو کام کیاگیا ہے۔ الحمدللہ تعالی اس میں کامیابی ملی کہ لوگوں تک پیغام ابراہیمؑ کو پہنچا سکا جس کے ذریعہ لوگوں میں سیرت ابراہیم ؑکو جاننے ،سمجھنے کا شوق اور ولولہ پیدا ہوا۔

34 سوالات پر مبنی اس کوئز کے بہت سے دلچسپ سوالات میں سے دو سوالات بطور نمونہ پیش ہے:

آج کل کچھ لوگوں کا ماننا ہے کہ قربانی میں جانور ذبح کرنے کے بجائے اس کی جگہ کیک کاٹنا یا اس رقم کو غریبوں میں خرچ کرنا زیادہ بہتر ہے۔ شرعی طور پر کیا بہتر ہے؟

1 رقم غریبوں میں خرچ کرنا            2 قربانی کرنا    3 کیک کاٹنا

دوسرا سوال تھا کہ حضرت اسماعیلؑ کے سلسلہ نسب سے ایک ہی نبی مبعوث ہوئے ان کا نام کیا ہے؟

حضرت محمد ﷺ              حضرت عیسیؑ           حضرت یحیؑ

الغرض 100 نمبرات کے اس کوئز میں 76حضرات نے 100 میں 100 نمبر لے کر اول پوزیشن حاصل کی۔ جب کہ81حضرات نے100 میں 97نمبر لے کر دوسری پوزیشن پر قبضہ جمایا اور 2حضرات نے 100 میں 96 نمبر لے کر تیسری حاصل کی چوں کہ 120 حضرات نے 100 میں 94 نمبرات حاصل کر اپنی چوتھی پوزیشن بنائی۔ یہ بتانا اہم ہوگا کہ394 حضرات نے 90 سے زائد نمبرات حاصل کیے ہیں۔ اس لیے یہ بھی قابل ذکر ہیں ۔ان سب کو بہت بہت کو مبارک باد پیش کرتا ہوں ساتھ ہی انھیں بھی مبارک باد پیش کرتا ہوں جنھوں نے کوشش کی اگرچہ ان کے نمبر کم آئے۔

میں اللہ تعالی سے دعا کرتا ہوں کہ امت مسلمہ کو پیغام ابراہیم سمجھتے ہوئے اس پر عمل پیرا ہونے کی توفیق بخشے ساتھ ہی میری کوئی کمی یا کوتا ہی ہو گئی ہو تو اسے معاف فرمائیں اور میری اس کوشش کو شرف قبولیت بخشے آمین۔ 

نوٹ: یہ اس کوئز کا لنک تھا https://forms.gle/vSR4iYVaSiQmu5fq5

جسے اب بھی اوپن رکھا گیا ہے تاکہ اب بھی کوئی حصہ لینا چاہے تو لے سکتا ہے مگر ہمارے رکارڈ میں شمار نہیں ہوگا-

                        محب اللہ قاسمی

 

Har ek baat pe kahte ho tum ke tu keya hai

مجھے تو پسند ہے ہی میرے بیٹے کو بھی چچا غالب کا یہ شعر بہت پسند ہے.

ہر یک بات پہ کہتے ہو تم کہ تو کیا ہے

تمہیں کہو کہ یہ انداز گفتگو کیا ہے

Aaah ....Mere Dost ke Walid ka Inteqal

 

آہ.... میرے دوست کے والد کا انتقال

یوں تو میرے بچپن میں بہت سے دوست ہوئے، جسے حتی الامکان نبھانے کی میں نے بڑی کوشش کی اور آج بھی نبھانے کی سعی کرتا ہوں. کچھ پٹنہ میں اسکولنگ کے دوران دوست اور کلاس میٹ ہوئے تو کچھ وہاں سے لوٹ کر گاؤں آیا تو گاؤں میں کچھ بچپن کے یار بنے تو کچھ مدرسے میں میرے دوست ہوئے تو کچھ دارالعلوم دیوبند میں ملک مختلف حصوں سے کلاس میٹ کی شکل میں بھی دوست بنے. اب دہلی میں ہوں تو یہاں بھی میرے بہت سے ساتھی اور دوست ہیں.

لیکن ابھی میں جس دوست کا ذکر کر رہا ہوں وہ میرے پچپن کا ایسا دوست ہے جہاں سے میں نے جانا کہ دوستی کسے کہتے ہیں. چھٹیا یعنی چھوٹے یہ اس کا نام نہیں ہے. اس کے گھر والے اور گاؤں لوگ اسے پیار سے اسی نام سے بلاتے ہیں ویسے اس کا اصل نام مطیع اللہ ہے. جو میری ہی طرح اپنے بھائی بہنوں میں سب سے بڑا ہے. آج صبح (15 اکتوبر 2021) واٹس ایپ پر فاطمہ چک گروپ کے ذریعہ اطلاع ملی کہ ان کے والد محترم محمد معراج صاحب کا طویل علالت کے بعد انتقال ہو گیا. انا للہ وانا الیہ راجعون!

موصوف ایک نیک صفت، جفا کش، محنتی اور کم گو انسان تھے. نماز کے پابند اور گاؤں کی مسجد میں اذان دینے کے خواہش مند رہتے، جس کے لیے وہ وقت سے پہلےمسجد پہنچنے کی تیاری کرتے اور وقت پر اذان دیتے تھے. وہ کافی محنتی تھے یہی وجہ ہے کہ بڑی محنت سے تجارت کی اور اللہ نے اس کی برکت سے گھر میں خوش حالی عطا کی. مکان بنایا اپنے دو بیٹوں کو تجارت میں لگایا اور انھیں بھی آگے بڑھایا. ایک چھوٹا لڑکا جسے کافی پڑھایا لکھایا. اس طرح ایک بیٹی اور تین بیٹے سب کی شادی کر اپنی ذمہ داری پوری کی.

 ادھر کافی دنوں سے آپ بہت بیمار چل رہے تھے. چوں کہ موت ایک حقیقت ہے سو موت نے انھیں اپنی آغوش میں لے لیا اور آپ دار فانی کو چھوڑ گئے اور اپنے مالک حقیقی سے جا ملے. 25 جنوری 2019 کو میرے والد محترم کے انتقال کا سانحہ پیش آیا اور آج دو سال بعد میرے دوست کے والد چل بسے. اولاد کے لیے والد کا سایہ عاطفت کیسا ہوتا ہے اسے وہی محسوس کر سکتا ہے جس کے والد کا انتقال ہوگیا ہو.

اللہ تعالیٰ سے دعا ہے کہ اللہ پاک اپنے فضل و کرم سے ان کی کمی کوتاہیوں کو معاف کرے، ان کی مغفرت فرمائے، جنت الفردوس اعلی مقام بخشے اور اہلیہ، تین بیٹے اور ایک بیٹی سمیت تمام لواحقین کو صبر جمیل عطا کرے.       محب اللہ قاسمی