Munajat : Malike Haqiqi

مناجات اے مالک حقیقی ……  محب اللہ رفیقؔ

در پر میں تیرے آیا اے مالک حقیقی

تو ہی ہے میرا داتا اے مالک حقیقی

بے کس پہ رحم کرنا اے مالک حقیقی

’خالی ہے میرا کاسہ اے مالک حقیقی‘

تجھ ہی سے لو لگاؤں، امید تجھ سے باندھوں

تجھ پر رکھوں بھروسہ اے مالک حقیقی

دنیا میں تیرے بندے کم زور پڑ گئے ہیں

دے دے انھیں سہارا اے مالک حقیقی

دل کا چراغ روشن تیری ہی یاد سے ہے

ظلمت سے دور رکھنا اے مالک حقیقی

مشکل کشا بھی تو ہے، حاجت روا بھی تو ہے

تو سب کا ملجا، ماویٰ، اے مالک حقیقی