Isteqbale Ramzan aur Hamari Zemmedariyan

استقبال رمضان اور ہماری ذمہ داریاں

                                                         محب اللہ قاسمی

اللہ تعالی کے فضل و کرم سے بہت جلد ماہ رمضان اپنے فضائل برکات کے ساتھ ہم پر سایہ فگن ہونے والا ہے۔ اس ماہ مبارک کی عبادات، ثواب اور ماحول میں برکت بڑی برکت رکھی ہے۔ گویا نیکوں کا موسم بہار آنے والا ہے۔ اس لیے ہم اس ماہ مبارک کا استقبال کریں۔

 اللہ کے رسول صلی اللہ علیہ وسلم شعبان کے مہینے میں صحابہ کرام کو اکٹھاکرتے اورخطبہ دیتے جس میں انھیں رمضان کی آمدکی خوش خبری سناتے تھے۔رمضان کی فضیلت اور اہمیت کے پیش نظر اس کی تیاری کے سلسلے میں توجہ دلاتے ۔ایسے ہی خطبہ میں آپ نے ارشادفرمایا:

’’اے لوگو! عنقریب تم پر ایک عظیم الشان ماہ مبارک سایہ فگن ہونے والا ہے۔ اس ماہ مبارک میں ایک رات ایسی بھی ہے جو ہزارراتوں سے بہترہے۔ اللہ تعالیٰ نے اس ماہ کے روزے فرض کیے،اس کے قیام کو اپنی خوشنودی کا ذریعہ قراردیا، توجس شخص نے اس ماہ میں ایک چھوٹا سا کارخیرانجام دیا اس نے دیگرماہ کے فرائض کے برابرنیکی حاصل کرلی، یہ صبراورہمدردی کا مہینا ہے۔ ساتھ ہی یہ وہ ماہ مبارک ہے،جس میں اللہ اپنے بندوں کے رزق میں اضافہ فرماتاہے۔ اس ماہ مبارک میں جس نے کسی روزے دارکوافطارکرایا۔ روزے دار کے روزے میں کمی کے بغیراس نے روزے دارکے برابرثواب حاصل کیا۔ اورخود کو جہنم سے بچالیا۔صحابہ کرامؓ نے عرض کیا:اے اللہ کے رسولﷺ ہم میں سے ہرشخص تو روزے دارکو افطارکرانے کی استطاعت نہیں رکھتاہے؟ آپ نے فرمایا: جس نے روزے دارکوپانی کا گھونٹ پلایا، یا دودھ کا گھونٹ پلایا، یا ایک کھجورکے ذریعے افطار کرایا اس کا اجراسی کے برابرہے اوراس کے لیے بھی جہنم سے نجات ہے ۔اس سے روزے دار کے اجرمیں کمی نہیں ہوگی۔ جس نے اپنے ماتحتوں سے ہلکا کام لیا اس کے لیے بھی جہنم سے نجات ہے۔(مشکوۃ)

اس لحاظ سے ہماری ذمہ داری مزید بڑھ جاتی ہے کہ ہم اس ماہ تربیت سے اپنی تربیت حاصل کریں۔ عبادت و ریاضت، حقوق اللہ اور حقوق العباد کی ادائیگی میں خصوصی دلچسپی لیں اور ابھی سے ہی آنے والے بابرکت مہینے کی تیاری شروع کردیں۔ اگر ہم نے منصوبہ بند کوشش سے اس ماہ مبارک سے فائدہ نہیں اٹھایا اور خود کو اس ماہ مبارک کی نیکوں اور اللہ تعالی کی رضا کے حصول سے مالامال نہیں کیا تو رمضان المبارک جس طرح پہلے آتا رہا ہے آنیوالا بھی رمضان آئے گا، گزر جائے گا اور ہم کف افسوس ملنے کے علاوہ کچھ ہاتھ نہ آئے گا۔

اس لیے آئیے ہم لوگ ابھی سے اس کی تیاری میں لگ جائیں اور تقوی کی تربیت کے اس مہینے سے مستفید ہونے کا منصوبہ بنائیں۔ اللہ تعالی ہمیں حسن عمل کی توفیق بخشے۔ آمین یا رب العالمین

مفترق تحریریں

ہمارا ہند وستان

صدیوں ہم سب مل جل کر ایک ساتھ رہتے آئیں ۔۔ ایک دوسرے کے غم میں شریک رہے۔ ایک دوسرے کا تعاون کیا ۔۔۔ اور ہندوستان کو ترقی کے بام عروج تک پہنچایا۔۔۔ جب انگریزوں کا ناپاک سایا ہم پر پڑا تو ہندوستان کی آزادی کو بڑی قربانی کی ضرورت پڑی جس میں ہندوؤں کے ساتھ مسلمانوں نے سب سے زیادہ اور بڑی قربانی پیش کی اور ہندوستان کو آزاد کرایا۔

جب ہماری ایکتا پر برے لوگوں کی نظر پڑی تو آزادی کے بعد قومی یکجہتی کا ترانا گاتے گاتے ہماری زبانیں تھک گئیں تاکہ ہم لوگوں میں پیار محبت کے ساتھ مل جل کر رہیں اور نفرت کا سایا ختم ہو۔ 

مگر یہ مٹھی بھر فاسد عناصر، غنڈے موالی پر کوئی اثر نہیں! ایسا لگتا ہے کہ ان میں انسانیت نام کی کوئی چیز ہی باقی نہیں ہے۔

اب میرا سوال ہے کہ لاکھوں امن پسند ہمارے برادران وطن کہاں ہیں؟

کیوں نہیں وہ سرکار پر دباؤ بناتے؟؟

وہ کیوں خاموش تماشائی بنے ہوئے ہیں؟؟؟ کیوں ان غنڈوں کو اتنی آٓزادی دی گئی کہ وہ جب چاہیں، جہاں چاہیں فساد مچائیں غندہ گردی کریں اور کروڑوں امن پسند لوگ دیکھتے ہی رہیں۔

آئیے ہم سب مل کر پھر سے وہی پرانا ہندوستان ڈھونڈ لائیں جوفرقہ پرستی کی زد میں آ کر کہیں گم ہو گیا ہے۔       (محب اللہ قاسمی)

اذان کے بعد اب ڈائرکٹ کھلے میں نماز پر ہی روک

آپ جب چاہیں کھلے میں بھجن کرتن کریں، اٹھ جام کریں، کاوریاں کے ذریعہ رستہ جام کریں، ہمیں کوئی آپتی نہیں ہوتی، کوئی پریشانی نہیں! بلکہ گرمی کی شدت میں شربت اور پانی بھی پلایا جاتا ہے۔ دیگر سہولیات فراہم کی جاتی ہیں ہمیں کوئی شکوہ نہیں۔۔۔اور ہم تھوڑی دیر کے لیے پرسکون نماز پڑھ لیں تو آپ کو اس پر آپتی ہے۔ شرپسند عناصر اور غنڈوں کو روکنے کے بجائے نماز پر ہی پابندی لگا رہے ہیں....افسوس شرمناک بات ہے!

جس طرح سرکاری زمین تمہاری ہے اسی طرح ہماری بھی ہے۔

سبھی کا خون ہے شامل یہاں کی مٹی میں

کسی کے باپ کا ہندوستان تھوڑی ہے

مگر مجھے ڈر لگ رہا ہے کہ مصلحت پسندی میں کہیں یہ بھی بیان نہ آجائے کہ ہمیں نماز پڑھنے کی کیا ضرورت ہے۔ گھر میں پڑھ لیں گے .... آزادی کے ستر سال بعد آج ہم یہاں تک آ پہنچے۔ جب کہ ہندوستان کی آزادی میں سب سے زیادہ اور بڑی قربانی مسلمانوں نے دی ہے۔  (محب اللہ قاسمی)

علی گڑھ مسلم یونیورسٹی

اتنے سال بیت گئے کسی کو جناح کی تصویر کا خیال نہیں آیا اس کے مزار پر جاتے رہے... کتابوں میں اس کی تعریفیں کرتے رہے اب اچانک جناح کی تصویر سے نفرت ہونے لگی اور ہنگامہ کھڑا کر دیا.تقسیم کا ذمہ دار صرف وہی تو نہیں!

کس کس کی تصویر نکالو گے کون کون سی کتاب جلاؤ گے کس کس پنے سے ناموں کو ہٹاؤ گے. کہیں گاندھی کے ساتھ اس کی تصویر سے تو ناراض نہیں...؟ یا وہ انگریزوں کے خلاف تھا اس لیے تو خفا نہیں...

ویسے بھی جناح کی تصویر ہمارے نزدیک کوئی معنی نہیں رکھتی پر کیا ساورکر اور ناتھو رام گوڈسے کی تصاویر کو بھی ہٹا دیا جائے گا جو انگریزوں کے ایجنٹ اور گاندھی جی کا قاتل تھا.

تصوير کو لے کر کیوں فساد مچاتے ہو بھائی؟ یہ نفرت کی آگ کیوں لگائی؟؟؟

 #WeStandWithAMU

                                             لال قلعہ 

ویوپاری کا کام ویوپاری کرنا- اب کون تاجر کیا بیچ دے یہ اس کی عزت غیرت کی بات ہے۔ ہم تو بس اتنا جانتے ہیں کہ اب ہندوستانی شہری بھی لال قلعہ گھومنے جائے گا تو اپنا حق نہیں بلکہ گراہک کے طور پر جائے گا۔ کیوں کہ اب یہ حکومت کی دھروہر نہیں بلکہ متعینہ مدت تک کے لیے پرائوٹ کمپنی کی ملکیت ہوگئی۔
اب اس پر خوشی منائے یا افسوس!      (محب اللہ قاسمی)

Ghazal : Huffaz Shahidon pe jo kuch bhi hua kuch bhi nahi hai

 غزل

ایمان کی دولت کے سوا کچھ بھی نہیں ہے

راضی جو نہیں رب تو بھلا کچھ بھی نہیں ہے 

دنیا میں سکوں، عقبی میں توقیر کی چاہت

ایمان نہیں ہے تو ملا کچھ بھی نہیں ہے

ہر درد جہاں کی ہے دوا، دین نبیؐ میں

اس کے سوا دنیا میں دوا کچھ بھی نہیں ہے 

تم کو  تو  ملالہ کا بڑا رنج ہے لیکن

خفاظ پہ جو کچھ بھی ہوا کچھ بھی نہیں ہے

فرعون تو غرقاب ہوا تو بھی مٹے گا

قاتل کہیں بچوں کا بچا کچھ بھی نہیں ہے

غیرت نے پکارا ہے کہ میدان میں آؤ

جینے کا مزہ اس کے سوا کچھ بھی نہیں ہے

ظلمت کو مٹانا ہے تو جل شمع کے مانند

ظلمات کے شکوے سے ملا کچھ بھی نہیں ہے

ظالم تو مٹانے پہ تلے ہیں ہمیں لیکن

ظالم کو مٹانے کی صدا کچھ بھی نہیں ہے

مولی کی رضا پر ہی چلو تم بھی رفیق اب

منزل ہے وہی اس کے سوا کچھ بھی نہیں

 محب اللہ رفیقؔ

Han main Syed Muhammad Wali Rahmani Hun.

*ہاں میں سید محمد ولی رحمانی ہوں۔۔۔*!

نازش ہما قاسمی

  جی ہاں میں ہی سید محمد ولی رحمانی ہوں جو جنرل سکریٹری آل انڈیا مسلم پرسنل لا بورڈ اور امیر شریعت بہار واڈیشہ وجھارکھنڈ ہے۔ہاں میں وہی ولی رحمانی ہوں جن کے والد کا نام سید منت اللہ رحمانی ہے جو بانی آل انڈیا مسلم پرسنل لا بورڈ ہیں ۔ میرے دادا کا نام حضرت مولانا سید محمد علی مونگیری ہیں جن کی مرہون منت ندوۃ العلما ہے۔ میری پیدائش پانچ جون 1943کو مونگیر میں ہوئی۔ میں نے اپنی تعلیم رحمانیہ اردو اسکول خانقاہ رحمانی ، جامعہ رحمانی مونگیر، ندوۃ العلما، دارالعلوم دیوبند اور تلکا مانجھی یونیورسٹی بھاگلپور سے حاصل کی۔ میں جیلانی سادات گھرانے سے تعلق رکھتا ہوں۔ الحمدللہ ثم اللہ سید ہوں۔میرا سلسلہ نسب شیخ عبدالقادر جیلانی علیہ الرحمہ سے 25واسطوں سے ملتا ہے۔ میرے آباء میں سے ابوبکر چرم پوش تقریباً ساڑھے تین سو سال قبل ملتان سے مظفر نگر یوپی کے کھتولی میں آکر قیام پذیر ہوئے اور یہیں سکونت اختیار کرلی۔ پھر میرے جدامجد سید شاہ غوث علی مظفر نگر سے کانپور منتقل ہوگئے اور وہاں بودو باش اختیار کی۔ کانپور میں ہی شاہ سید عبدالعلی علیہ الرحمہ کے یہاں تین شعبان المعظم 1224 مطابق 28 جولائی 1825 کو میرے دادا محترم سید محمد علی مونگیری کی پیدائش ہوئی۔ میرے دادا محترم نے بہت ا نقلابی اقدامات اُٹھائے۔ قادیانیوں کا مقابلہ کیا، ندوۃ العلما کی بنیاد ڈالی۔ مسیحیت کے خلاف محاذ آرائی کی۔ وہ ہمیشہ تہجد پڑھا کرتے تھے لیکن قادیانیوں سے مقابلہ کے لیے انہو ںنے اپنے تہجد کے وقت کو بھی فارغ کردیا تھا۔انہوں نے قادیانیت کی مکمل سرکوبی کے لیے خودکووقف کردیا،وہ اپنے مرشدحضرت شاہ فضل رحماںگنج مرادآبادیؒ کے حکم پربہار کے ضلع مونگیرآئے۔ندوۃ العلماء کے بعض اراکین کے سخت اختلافات سے دلبرداشتہ ہوکر انہوں نے استعفیٰ دے دیا۔

    ہاں میں وہی ولی رحمانی ہوں جن کے والد محترم سید منت اللہ رحمانی تھے جنہوں نے شریعت کے تحفظ کے لیے بے جگری سے ایسی تحریک چلائی کہ چند برسوں میں گائو ں دیہات تک یہ تحریک پہنچ گئی اور عوام وخاص نے ان کی صلاحیت کا لوہا مان لیا۔ان کاہی فرزندہوں جس نے شیخ الاسلام مولاناحسین احمدمدنیؒ کے ساتھ جیل میں وقت گذارا۔ جی ہاں میں وہی ولی رحمانی ہوں جو عظیم دادا، عظیم باپ کا عظیم بیٹا ہوں۔ ہاں میں وہی ولی رحمانی ہوں جس نے والد بزرگوار کے نقش قدم پر چلتے ہوئے حکومت کے طلاق ثلاثہ بل کے خلاف ایسی تحریک چلائی کہ قریہ قریہ، گائوں گائوں، شہر شہر، ہر خاص وعام مسلمان تک یہ بات پہنچ گئی ۔ وہ مسلمان جو بورڈ کو بھول چکے تھے دوبارہ سے جان گئے کہ کوئی تنظیم ہے جو مسلم پرسنل لا کی حفاظت کے لیے کام کررہی ہے اس تنظیم کا کوئی رہبر ہے جو ہمیں شریعت کی حفاظت کے لیے آواز دے رہا ہے لہذا اس کی آواز پر ہمیں نکلنا چاہئے اور دنیا نے دیکھ لیا صرف تین ماہ کی مدت میں پورے ہندوستان سے شریعت مخالف بل کے خلاف کروڑوں خواتین اسلام نے سڑکوں پر نکل کر حکومت وقت کو عندیہ دے دیا کہ شریعت ہماری، جان سے پیاری اس میں چھیڑ چھاڑ ہمیں برداشت نہیں۔اوردوسوریلیاں نہایت پرامن طریقے سے ہوئیں۔جی ہاں میں وہی سید محمد ولی رحمانی ہوں جو1972 سے 1995 تک مسلسل تئیس برس تک بہار قانون ساز کونسل کا رکن رہا۔ ہاں میں وہی ولی رحمانی ہوں جس نے مدارس کی حفاظت کے لیے تحریک چلائی اور مونگیر میں تاریخ ساز ناموس اسلامیہ کنونشن منعقد کیا جس کے اثرات پورے ملک پر مرتب ہوئے۔ ہاں میں وہی سید محمد ولی رحمانی ہوں جس نے قوم کے ہونہار بچوں کے لیے رحمانی تھرٹی کا قیام عمل میں لایا تاکہ اس کے ذریعہ سے مسلم بچے اعلیٰ تعلیم حاصل کرکے اونچے اونچے عہدوں پر فائز ہوسکیں،آئی آئی ٹی انجینئر،ڈاکٹر، جج بن سکیں ، وکیل بن سکیں، آئی پی ایس آفیسر بن سکیں۔ چارٹرڈ اکائونٹنٹ بن سکیں۔ہاں میں وہی ولی رحمانی ہوں جس کے رحمانی تھرٹی نے کم ہی مدت میں بہترین نتائج پیش کیے اور ملک کو اعلیٰ ترین اورذہین وہونہار بچے دئیے جوآج جگہ جگہ اونچے اونچے مناصب پر براجمان ہوکر مسلمانوں کی رہنمائی کررہے ہیں۔

 

    ہاں میں وہی ولی رحمانی ہوں جو بھارت جیوتی ایوارڈ، راجیو گاندھی ایکسلنس ایوارڈ ، سرسید ایوارڈ،سے سرفراز کیاجاچکا ہوں۔ ہاں میں وہی ولی رحمانی ہوں جو کہنے کو تو صرف خانقاہی ہوں لیکن کبھی کبھی خانقاہوں سے نکل کر رسم شبیری ادا کرتا ہوں تاکہ لوگ مجھے سمجھ سکیں۔ مجھے جان سکیں۔ ہاں میں وہی ولی رحمانی ہوں جسے آکسفورڈ یونیورسٹی نے تعلیم پراظہارخیال کے لے عالمی میٹ میں مدعوکیاتھا۔ ہاں میں وہی ولی رحمانی ہوں جسے کولمبیا یونیورسٹی نے ڈاکٹریٹ کی اعزازی ڈگری سے نوازاہے۔ ہاں میں وہی ولی رحمانی ہوں جس کے استاد ڈاکٹر سعید الرحمن اعظمی بھی عظیم ہیں اور جس کا شاگرد خالد سیف اللہ رحمانی فقیہ عصر ہے۔

 

    ہاں ہاں میں وہی ولی رحمانی ہوں،جس نے سپریم کورٹ کے جج سے معافی منگوائی،منموہن سنگھ کے پاس پہونچ گیاکہ آپ پہلے اپنی داڑھی منڈوائیں،کیوں کہ سپریم کورٹ کے جج نے ایساکہاہے۔ میں وہی ولی رحمانی ہوں جس نے آرٹی ای ایکٹ جیسے خطرناک قانون میں تبدیلی کرائی۔اگروہ پاس ہوگیاہوتاتوآج بی جے پی، مدارس پربہت آسانی سے ہاتھ ڈال سکتی تھی۔ ہاں میں وہی ولی رحمانی ہوں جس نے ڈائریکٹ ٹیکسزکوڈبل میں تبدیلی کروائی،مرکزی مدرسہ بورڈکے ذریعہ مدارس میں مداخلت کی کوشش کوروکا۔

 

    ہاں میں وہی ولی رحمانی ہوں جس نے آزاد ہند کے بعد سب سے بڑی ریلی امارت شرعیہ کے بینر تلے پٹنہ کے گاندھی میدان میں منعقد کرکے حکومت سے دو ٹوک سوال کیا اورخواتین کے تحفظ ،مسلمانوں کے تحفظ،ان کے استحصال، ہرمدعے پراسے گھیرا، مسلمانوں کی مضبوط آوازایوان اقتدارتک پہونچائی اوران لوگوں تک بھی پہونچائی جوستربرسوں سے مسلمانوں سے صرف ووٹ لیتے رہے۔ اس کی ناکامیوں کو گنوایا ، ملک اورآئین کے سیکولرزم کاواسطہ دیا، دلتوں کوبھی ساتھ لانے کی کوشش کی، ان کودرپیش خطرات سے آگاہ کیا۔ اس تاریخ ساز ریلی میں دس لاکھ سے زائد افراد نے میری آوازپرلبیک کہہ کر حکومت کو یہ واضح پیغام دے دیا کہ ہم اپنے امیر کی اطاعت پر ملک کی حفاظت اور شریعت کی حفاظت کریں گے۔جس طرح عظیم آباد میں دلت، مسلم اتحادکاعظیم نظارہ بی جے پی اورآرایس ایس کوبھانہیں رہاہے،اسی طرح کچھ ضمیرفروش ،جھوٹوں،الزام لگانے والوں اوربے شغل لوگوں کوبھی کامیابی راس نہیں آرہی ہے۔ریلی کی مخالفت توپہلے سے ہورہی تھی،بعدمیں بھی کرنی ہی تھی،چوں کہ ان کاپیشہ ہی یہی ہے۔یہ تاریخ ساز ریلی کی کامیابی لوگوں کو راس نہ آئی، اسے سبو تاژ کرنے کے لیے کارڈ کھیلنا شروع ہوگیا۔ مجھ پر الزامات عائد کیے گئے۔ اگر مجھے سفارش ہی کرنی ہوتی تو کیا میں ایم ایل سی کے لیے سفارش کرتا؟، یہ عہدے تو میری جوتیوں کی نوک پر ہمیشہ رکھے رہتے ہیں۔ولی رحمانی عہدوں کا بھوکا شخص نہیں ہے۔

 

    میں وہی ولی رحمانی ہوںجس نے وزیراعلیٰ کے عہدہ تک کولات ماراہے،ایسی خواہش ہوتی تووزیراعلیٰ بن جاتا،کانگریس کے ذریعہ پیش کردہ گورنراورمرکزی وزیرکے عہدوں کوٹھکرادیاہے۔اپنے سیاسی رسوخ کااستعمال ہمیشہ ملی مفادکے لیے کیا،کتنے بلوں پرسرکارکومجبورکیا،ابھی تازہ تازہ کانگریس اورسیکولرپارٹیوں کوراجیہ سبھامیں طلاق بل پرموقف بدلنے پراپنے ساتھیوں کے ساتھ مجبورکیا۔ کیامجھے ایم ایل سی بنوانے کے لیے ریلی کی ضرورت ہے؟۔ اس چھوٹے سے عہدے کے لیے میں بہار کے عوام کودھوکہ نہیں دے سکتا۔ کتنے میری سفارش پرمرکزی وزیربنے،کے رحمان خان کی مثال موجودہے ۔کتنوں کومیرے خط پرلوک سبھااورودھان سبھاکاٹکٹ ملا۔ایک اشارے پردرجنوں لیڈربن گئے ۔مجھے اس کے لیے ریلی کی کیاضرورت تھی؟ایک اشارہ کافی تھا اورنہ مجھے خودکسی عہدہ کی ضرورت ہے۔ میں خودتیئیس برس ایم ایل سی اورقانون سازکونسل کاڈپٹی چیئرمین رہ چکاہوں۔اب کون سا ایم ایل سی بنوں گا،اتنے اہم سیاسی عہدے ٹھکراچکاہوں،لالچ ہوتی توبہت کچھ بن چکاہوتا۔

     ہاں ہاں میں وہی محمدولی رحمانی ہوں جس نے مدرسہ شمس الہدیٰ کے صدسالہ اجلاس میں نتیش کمارکوکھری کھوٹی سنادیاتھااورحق بیانی سے وہاں بھی نہیں چوکا۔یہ بھی توسوچناچاہیے کہ نتیش سے میری بنتی بھی نہیں ہے ۔ویسے ایک بات پوچھوں؟ حیدرآبادمیںایک اہم تنظیم کی کانفرنس ہوئی،اسی دن تنظیم کے اسٹیٹ صدرکوایم ایل سی کاعہدہ دے دیاگیا۔اس وقت سودے بازی کی بات کیوں نہیں اٹھی؟ ۔ ایک بات اورپوچھتاہوں،ادارئہ شرعیہ کے بلیاوی جدیوسے ایم ایل سی ہیں،راجیہ سبھاایم پی بھی رہ چکے ہیں۔ادارئہ شرعیہ کواس میں سودے بازی کیوں نہیں نظرآتی ہے؟۔دہلی کے تال کٹورہ اسٹیڈیم میں علمائے مشائخ بورڈکے پروگرام کاافتتاح مودی جی نے کیا، اس وقت سنی بھائی کہاں سوئے ہوئے تھے؟۔اس میں سودے بازی نہیں تھی؟۔برانہ لگے توکچھ اورپوچھتاہوں۔ایک اورمشہورعالم کانگریس کے ٹکٹ پراٹھارہ سال ایم پی رہے،کیاانہوں نے بھی بابری مسجدکاسوداکرلیاتھا؟ ایک اورمولانااجیت سنگھ کے ٹکٹ پرراجیہ سبھاایم پی بنے،دوبارمودی جی اوردوبارراج ناتھ سنگھ سے ملاقات کرچکے ہیں، عید ملن میں بلایا،اب گھرپرجاکرملاقات کی ۔کیامیں ان لوگوں کوسوداگربول دوں؟۔نہیں ،نیت پرمیں شک نہیں کرتا،ان پرالزام نہیں لگاتا،کسی کاایم پی بننااورایم ایل سی بننااگرسودے بازی کامعیارہے توبس یوں ہی پوچھ لیا۔ناراض مت ہونا۔سودے بازی میری سرشت میں نہیں ہے۔جولوگ میرے آباواجداداورخودمیری تاریخ سے واقف ہیں،وہ کبھی ایساسوچ بھی نہیں سکتے۔ میرے دادااوروالدنے بھی پوری زندگی اسلام کی نشرواشاعت میں صرف کردی اور میں بھی اپنے خاندانی مشن پر عمل پیرا ہوں اور ان شاء اللہ مرتے دم تک دین اسلام کی حفاظت کے کام کرتا رہوں گا یہی میری زندگی کا مقصد ہے۔جنہیں جتنی مخالفت کرنی ہے،کریں ،مجھے ٹٹ پونجیے سے کوئی فرق نہیں پڑتا،میں جانتاہوں کہ وہ پیسے کے بھوکے ہیں،کتے کے آگے روٹی ڈال دو،وہ خاموش ہوجاتاہے۔لیکن میں چارہ ڈالوں گانہیں،بلیک میلروں کوپہچانتاہوںمیں ’’فلائیٹی بلیک میلرز‘‘ کی پرواہ نہیں کرتا۔ان کی اوقات ہی کیاہے؟جانتاہوں ۔ گدھے کوچھت پرچڑھانے سے وہ نقصان ہی پہونچاتاہے ۔وہ چھت بھی توڑتاہے ،خودبھی گرتاہے اوردوسروں کوبھی گراتاہے ۔

    ہاں میں وہی ولی رحمانی ہوں،جس کی ہرقدم پرمخالفت کی گئی لیکن اللہ نے ہردم عنایت کی۔جوکہناہے کہتے رہیں،جوگڑھناہے،گڑھتے رہیں،مجھے کوئی فرق نہیں پڑنے والا۔جرات وہمت اوربلندحوصلگی اورقوت فیصلہ میری پہچان ہے ،زبان وقلم کابادشاہ ہوں،بیسیوں کتابوں کامصنف ہوں،ہرایک میری قانونی موشگافیوں اورصلاحیتوں کامعترف ہے ۔مجھے عہدوں کی لالچ نہیں۔میرے پاس دولتوں کی کمی نہیں کہ میں کسی لالچ میں آکردین کا سودا کروں۔سیاسی عہدے میری جوتیوں کے نیچے ہیں ،وہ بھی ایم ایل سی کی کرسی دلوانے کے لیے میں کیسے پورے عوام کااعتمادمتزلزل کردوں۔طرح طرح کی بے بنیادباتیں گڑھی جارہی ہیں،لیکن خدادیکھ رہاہے،وہ دلوں کامالک ہے۔جس اخلاص کے ساتھ میں نے اتحادامت کی کوشش کی،ملک میں پہلی باردلت ،مسلم اتحادنے مسلمانوں کے وجودکاملک بھرکواحساس دلادیااورانہیں احساس کمتری اورخوف کی نفسیات سے باہرنکال دیا۔یہ خودایک بڑی کامیابی ہے،سوئی ہوئی قوم بیدارہوگئی۔ہربارمسلمان کسی نہ کسی پارٹی کاجھولااٹھاکرآتے تھے۔اس بارپہلی مرتبہ خوداپنے دم پرآئے اوردوسروں کوساتھ لے کرآئے۔دلتوں پرسیاست کرنے والوں کی نینداڑگئی۔ہندی اورانگریزی میڈیا تجزیہ کرنے پرمجبورہوگیا۔پورے ملک میں مسلمانوں کاوزن محسوس کیاگیا۔ یہ افواہیں دشمنوں کی بوکھلاہٹ ہے اورہر کامیاب انسان کے پیچھے دشمن ہواکرتے ہیں۔بھیڑچلتی ہے توکتے بھونکتے ہی ہیں۔جودلوں پر حکمرانی کرتاہو،اسے دنیاوی عہدوں کا شوق نہیں رہتا۔ ۔۔۔منکووووووول۔۔۔

*******************************

برادرم نازش ہما قاسمی صاحب
آپ کی یہ بر وقت تحریر جس کی نہ صرف توقع بلکہ مطالبہ تھا کہ منظر عام پر آئے اور کم ظرف لوگوں کو آئینہ دکھائے... الحمد للہ آپ نے امت کے اس مطالبے کو پورا کیا اور ہر زاویے سے مکمل اور مدلل گفتگو کی جس کی روشنی میں لوگ اپنے قائدین پر نہ صرف اعتماد کو باقی رکھیں گے بلکہ اپنی بے تکی باتوں اور گھٹیا الزام تراشی سے پہلے ہزار بار سوچیں گے.

میرے پاس الفاظ نہیں کہ میں کس طرح آپ کا شکریہ ادا کروں...اللہ تعالی آپ کو دونوں جہاں میں کامیاب و کارمران کرے .... جزاک اللہ خیرا.

Gazal : Dil me bbat chupa kar rakhna

غزل

دل میں بات چھپا کر رکھنا

کچھ جذ بات دبا کر رکھنا

خوابوں کی تعبیر کی خاطر

سارے خواب سجا کر رکھنا

نفرت کے تاریک جہاں میں 

پیار کی شمع جلا کر رکھنا 

بے باکی کے شیدائی ہو

رات کو رات بتا کر رکھنا 

پھونٹ ڈال کر ٹوٹ نہ جانا

سب کو ساتھ ملا کر رکھنا 

سودا مت کر لینا ہرگز

تم ایمان بچا کر رکھنا 

سکھ دکھ ساتھی ہیں جیون کے 

ان کو دل سے لگا کر رکھنا 

غیروں کو اپناؤ لیکن 

اپنوں کو اپنا کر رکھنا

محب اللہ رفیقؔ